آؤ آؤ! سیر کو جائیں
باغ میں جا کر شور مچائیں
اُچھلیں کُودیں ناچیں گائیں
آؤ، آؤ! سیر کو جائیں
کالے کالے بادل آئے
لہرائے اور سر پر چھائے
مینہ برسے گا خوب نہائیں
آؤ، آؤ! سیر کو جائیں
باغ میں تازے پُھول کِھلے ہیں
رنگ برنگے پُھول کِھلے ہیں
ہم بھی اپنا رنگ جمائیں
آؤ، آؤ! سیر کو جائیں
گیندا دیکھیں جُوہی دیکھیں
نرگس اور چنبیلی دیکھیں
میٹھے میٹھے میوے کھائیں
آؤ، آؤ! سیر کو جائیں
پیڑ پہ کوئل گاتی ہو گی
میٹھے بول سُناتی ہوگی
ہم بھی اپنا گیت سُنائیں
آؤ، آؤ! سیر کو جائیں
(صوفی تبسم)
شیئر کریں